IKET

Kiye crita lomboan .....
Dhong inyong neng Betawi tilik putu, inyong sempat numpak bis kota, mbareng mudhun iket inyong kecanthel lawang, dadine inyong ya ngorong-ngorong: " Ikeet .. ikeet ....." karo acung-acung meng iket sing cemanthel lawang....
Penjorangan banget ... ora ana wong sing gelem njiotna iket, malah iket inyong dejiretna neng lawang lewih kenceng maning ..... Jan sialan pisan rasane ....

Kembang tinggalan

Angger weruh kembange dadi kelingan karo almarhumah, sing duwe ..... Al fatihah ..... Aamiin .....

RUNTAH

Runtah dadi rupiah

Ati rasane trenyuh, weruh kota merah-meruh

kaya klambi ora tau dewasuh, lusuh kaya susuh

embuh, deneng koh ora ana sing aruh-aruh

weruh kota merah-meruh, atine dadi kesuh

apa ngganen wis langka panggonan nggo lebuh.

neng kota runtah njeprah mambrah-mambrah

saben dina ora suda, malah terus tambah

ora tuwa ora bocah, ora babah ora nyonyah

man Sariman, yu Sarinah karo mbok Siah

mung mecucu, jere pemerintah sing salah

Mbok aja padha nggolet sapa sing salah

aja nunggu ndadak nganggo deprentah

mayuh gemregah, kit bocah gutul si mbah

sikil jemangkah tangan obah, uteke polah

milih, milah, deolah, runtah dadi rupiah

Runtah deolah dadi rabuk tanduran

saka sayuran, woh-wohan lan pethetan

saben sore desapu ilang kabeh kotoran

elinga, keresikan sebagian saka iman  

Runtah plastik dewalik dadi migunani

bisa mbantu kebutuhan ekonomi

ora ketang mung uyah karo trasi

sukur bage bisa tuku angkot utawa taksi

r

Angger runtah wis ilang,

kotane padhang jingglang

enak angger desawang

kaya wong wis tanpa utang

Griya NEKULA, 28 Mei 2018

RA. Kartini mongkog apa ngajog ....

upamane RA Kartini egin sugeng nganti siki

apa sing depenggalih Ibu Kita Kartini

mongkog apa ngajog

mbuh, nyong ora weruh

Jaman kemajuan

emansipasi wis keleksanan

babagan kebisan,

apa-apa bisa kesembadan

Bocah wadon kaya lanangan

jaritan jere angel pisan

kon jaritan ben keton wadon

malah mangkat meng salon

weruh gelung jere bingung

kon nganggo kebayak

jere kaya kethoprak

kon nyambel jere sebel

dekon njangan, jere luwung njajan

Eman-eman jan eman-eman pisan

siki jaman kemajuan apa jaman edan

wong urip kayong ora nganggo aturan

jerene si ... wolak waliking kahanan

Urip mung sepisan

kayong padha nggo dolanan

kaya tuku pakean apa panganan

nganggo jajalan utawa cicipan

Bocah dolan ndina mbengi

umah kaya dene mesin cuci

mlebu belok, metu wis wangi

ngerti-ngerti nangis wetenge wis isi

Wong tuwa teyenge mung ngelus dhadha

pasrah maring sing Maha Kuwasa

nyuwun ngapura

sedaya lepat lan dosa kula.

Purwokerto, 13 April 2018

SLIRAMU

Aku tetep kelingan sliramu

kit esuk umun-umun gutul bengi mapan turu

esuk-esuk wis nggugah subuhan

jam sanga prentah aku kon olah raga

medang kopi aja legi-legi, wedang teh ora gulahan

Awan-awan arep mangan aku kelingan

jangan lodheh kon ora santenan

aku neng kulah sliramu neng sebelah

jam papat sliramu gemanthil neng mripat

Jam pitu seprapat aja keliwat ngombe obat

bengi-bengi rasane sliramu neng jero radio

tengah wengi sliramu gemlindhing

semandhing dadi guling pengeling

Al-Faatihah

...........................

Purwokerto, 29 Maret 2018