NONTON EBEG

Nang nong nang thuk nang nong nang jur

bonang, kenong, kethuk karo tambur

Gamelane wis detabuh,

ebege urung labuh.

Gendhinge, gendhing eling-eling

ebege wis molahi ngibing

gendhing eling-eling aweh piweling

wong-wong kon padha eling

sing wis eling ya balia maning

Gendhinge, gendhing eling-eling

dhukune melu ngibing

mripat mlirik maring piring

wadhah sajen, ana kreweng ana beling

mlirik maning maring dhapuran pring

ana wong wadon klambi kuning

Gendhinge ganti gendhing Baladewaan

kendhange mbleketaket pisan

ebege pating jligrang padha plumpatan

cepete lucu mlayu umpetan.

sing nonton seneng surak rame padha latahan

Gendhing baladewaan depedhot

ganti gendhing senggot

sing nonton padha singsot

ebege megat-megot kolore pedhot

sindhene madan sewot

kon madhang daginge alot

Ebege jundhall-jundhil njaluk ganti gending gudril

padha gudril, cagak awak jere sikil

sikil-sikil wedhus kuwe arane dhengkil

dhengkil wedhus debakar ora dekumbah

jahil-jahillullah wong jahil kenang tulah

Nonton ebeg neng ngisor pelem

sing nonton ana sing mendem

lengen ngececeng mripate kenceng merem

saya sore saya akeh sing mendem

sing nonton mesem-mesem marem

Purakerta, 2 Pebruari 2018