KEPUNGAN

Mbuh kawit jaman kapan masarakat, mligine masarakat Jawa wis padha nganakna tradisi kepungan. Pokoke kit inyong emut dadi bocah ya wis ana sing jenenge kepungan alias kendhuren utawa bancakan, cara wong wetane. Inyong lan ndeane uga bocah liya krasa seneng pisan angger ngerti bapane deundang kepungan. Batine mesthi moni: “Calone madhang lawuh enak kiye”.

Pancene sing jenenge tradisi, ya tradisi apa baena, klebu tradisi kepungan kuwe wong-wong wis padha kelalen utawane wis ora ngerti sapa sing miwiti nganakna, lan kapan wektune gole molahi nganakna acara tradisi kuwe mau. Kejabane gemiyene ana sing nyathet sapa lan kapan gole nganakna acara kuwe. Tapi paling ora ya wis puluhan taun masarakat gole nglaksanakna lha wis bisa desebut tradisi masyarakat.

Jaman inyong egin dadi bocah, saben selapanan utawa 35 dina sepisan, pas malem dina kelairane rama inyong kuwe, neng umah mesthi deanakna kepungan. Sore-sore bibine wis adang tumpeng. Sing demaksud adang tumpeng kuwe ora mung adang utawa gawe tumpeng, ningen kumplit selawuhane. Bar kuwe terus met godhong gedhang sing amba rong lembar nggo sarapane. Bar magrib uwa Yasa wis teka, terus deprentah kon undang-undang tangga teparo wong pitu.

Bubar ngisa wong sing deundang kepungan wis padha teka, terus langsung padha njagong neng klasa sing wis degelar sedurunge. Sewise kumplit sing deudang teka kabeh, godhong gedang degelar, tumpeng selawuhane detokna. Uwa Yasa keton trampil pisan gole mbagi sega tumpeng selawuhane nggo wong-wong sing arep kepungan kuwe.

Sewise depasrahna terus deujudna, salah siji wong sing wis biasa kon ndongani, dongane nganggo basa Arab dadi inyong ora ngerti artine. Lan sing maca donga kuwe ngertia artine apa ora inyong ya ora ngerti. Tapi inyong yakin lamona dongane kuwe anu penyuwunan maring Gusti Allah kon sangkane ramane karo inyong sebrayat deparingi slamet waras ora ana alangan sewiji apa.

Bubar dedongani panganan ora dentongna, depangan mung semendhing, lewihane debuntel nganggo godhong gedhang sing nggo gelaran depotong-potong sing gunggunge padha karo gunggung wong sing kepungan, Ora let suwe wong sing kepungan padha bali maring umahe dhewek-dhewek karo nyangking buntelan berkat lewihan kepungan.

Menurut pak gedhe Reksasiswaya, sing biasa paring ular-ular njelasna lamona sing jenenge tumpeng selawuhane, sing werna-werna wujud, rupa lan rasane kuwe perlambang utawa nggambarna lingkungan alam apa dene lingkungan sosial sing ana neng sekubenge awake dhewek kiye.

Lingkungan alam, tumpeng selawuhane neng dhuwur tampah nggambarna lamona alam raya kiye bunder kaya tampah ningen ora rata kaya tampah, ana gunung lan ana sing rata. Dene isine alam kiye ya werna-werna, ana kewan segara, kewan kali. utawa kewan daratan. Neng daratan ana sewernane tanduran, sing angger deolah bisa dadi panganan sing werna-werna rupa lan rasane,

Lingkungan sosial, tumpeng selawuhane nggambarna lamona kahanan neng lingkungan masarakat kuwe isine ya werna-werna rupa lan rasane. Ana ijo, kuning, cokelat, abang utawane putih, sing angger bisa selaras, serasi lan seimbang bisa dadi campuran sing enak desawang lan derasakna. Neng masarakat wis biasa ana beda pemikiran, ningen kabeh mau malah dadi gayenge wong gendhu-gendhu rasa, sing kabeh mau cara jaman sikine jere demokratis.

Neng masarakat babagan Gusti Allah kuwe degambarna utawa delambangna karo anane tumpeng, sing sengsaya mendhuwur sengsaya cilik lan akhire ora keton, ora kasat mripat. Kahanan sing kaya kuwe nduwe maksud ;lamona angger kepengin bisa bebarengan karo Gusti Allah wong kuwe kudu sengsaya cilik kepentingane karo babagan sing kasat mripat.