UDAN SEPISANAN

Mangsa kapat wis kliwat

mangsa kelima wis lunga

mangsa kanem nembe nimbul

Senen pahing sanga November

Mangsa terang limang wulan

lemah pecah ora ketiban udan

wong-wong padha ngresulah

uga ana wong salah polah

Akeh upaya nyuwun medhune udan

neng Banyumas cowongan utawa ujungan

neng Ponorogo adus neng beletan

neng Malang ngiring kucing pengantenan

Pemerintah nyebar uyah neng dhuwuran

para santri padha Istisqa neng lapangan

uga ana sing nggawa kewan piaraan

kabeh mau upaya murih mudhune udan

Kemis wingi wis wiwit grimis

urung deres mung kaya kinjeng pipis

godhong egin mbledug urung klimis

hawane madan adhem urung atis

Bocah cilik marahi si biyung dadi bingung

dekongkon neng warung tuku jagung

ora wurung karo batir dolanan payung

neng tengah lurung ndeleng kluwung

Alhamdulillh dhuh Gusti Allah

dina Jemuah udane tambah kathah

wong-wong wis padha bungah

senajan udan uga mlebu ngumah

Musim pancaroba wis teka

ora lanang ora wadon ora inyong ora rika

udan-udanan gawe ora enak badan

awak nggreges mriyang dadakan

Mung siki kudu eling ya kanca batir

bar udan biasane banjur banjir

ora cukup mung dhikir utawa mikir

tapi kudu temandang nyegah anane banjir