TLEMBUK POLITIK

Jamane siki wis owah

akeh wong sing pikirane melu owah

wong tuwa kaya bocah

sing bocah kaya wong wis umah-umah

bubar sekolah ora bali ngumah

malah munggah lor Rempoah

Jamane wis kewalik

dadi pikirane wis padha molak-malik

Neng negara republik

akeh rakyat cilik sing padha kecelik

kampanye ndakik-ndakik mung nggo taktik

pejabate melik dunya utawa dhingklik

Sejen maning neng dunia politik

isine wong pating pendelik

njabane meneng jeroane kebek sirik

wong liya ora ana sing becik

kesenggol sethithik langsung mrekitik

becik dekritik salah langsung decuthik

Ana maning tembung tlembuk politik

ora tuwa ora enom ora gedhe ora cilik

agama deglethakna genti ideologi politik

tasbeh semeleh, genti koin mirip benik

jujur wis kabur, nglombo deanggep becik

ora ketang adol kutang mambu tengik

sing baku kudu tetep olih dhingklik

Tlembuk politik ana neng kabeh panggonan

sekang kota gutul karang perdesan

sekang tingkat pusat gutul RT RW utawa kelurahan

neng pinggir dalan uga neng kantoran

neng penginepan uga neng warung makan

tuwuh kaya jamur neng mangsa rendhengan

mligine angger meh coblosan …..