Mboten Purun Ngutangi

Para pakar kemiskinan mbedakna babagan kemiskinan sekang 3 aspek, yakuwe:

1.  Kemiskinan ekonomi, yakuwe kemiskinan sing deartekna merga kekurangan sumber daya (pengetahuan, ketrampilan, kebisan mimpin, kekarepan, lan liya-liyane) sing bisa denggo nggo ngunggahna kesejahteraan wong siji utawa seklompok wong.

2.  Kemiskinan sosial, sing deartekna kahanan kekurangan jaringan lan susunan sosial, sing nyengkuyung wong kuwe ben olih kesempatan nggo ngunggahna asil kerjane.

3.  Kemiskinan politik deartekna kemiskinan merga sekang langkane kesempatan wong kuwe ben teyeng manfangatna potensi sing deduwenii nggo ngembangna awake merga anane kewicaksanan sing detetepkna neng penguasa.

Kayane koh angger crita babagan wong miskin kuwe ora bakalan ana poge, ora bakalan ana rampunge. Kit jaman kuna lereng gutul jaman siki terus jaman sing arep teka tetep ana baen wong miskin kuwe. Aturan jakat pitrah wis ana kit jaman Nabi Muhammad saw. lan egin lemaku nganti jaman siki, lan mbuh kapan gole arep debusek.

Sejan-jane miturut sujarah, kit jaman penjajahan Landa upaya ngurangi kemiskinan kuwe ya wis ana lan lemaku. Gutul jaman kemerdekaan, pemerintah Indonesia ya wis nganakna pirang-pirang program nggo ngurangi penduduk miskin. Ningen nganti gutul jaman sekiye koh ya wong miskin egin akeh baen.

Sing paling pungkasan kiye Pogram Nasional Pemberdayaan Masyarakat sing desebut PNPM Mandiri apa kuwe neng perkotaan utawane neng perdesaan. Program kuwe jane wis ana kit akhir taun 1999 ningen tembe deresmekna neng masa pemerintahan Presiden SBY. Berita-berita sing ana neng masarakat, program kiye uga ninggalna kahanan sing ora nyenengna. Wong miskin ya tetep egin akeh.

Apa jalaran agama wis ngajarna lamona seperangan dunya brana kita kuwe duweke wong miskin utawa kudu desumbangna maring wong miskin, semana uga pemerentah wajib ngrumat wong fakir miskin dadi ana wong utawa wong-wong sing sengaja api-api miskin mung nggo ngarah sumbangan utawa bantuan kuwe.

Angger pemerentah gole ngurangi wong miskin kuwe nganggo cara nyilih-nyilihna dhuwit utawa mbageni dhuwit, jane neng masarakat uga wis ana cara sing kaya kuwe. Wong sing kepetung sugih nyilih-nyilihna dhuwit ora mawi nganggo boreh utawa agunan lan ora mawi nganggo anakan nggo modal usaha wong sing lagi butuh, apa kuwe sedulur utawa tanggane. Dene nyaure bisa bali dhuwit lan bisa uga nganggo tenaga.

Semana uga rama inyong, senajan ora sugih ningen ketung enthengan. Angger pas ana dhuwit lan butuhe ora akeh ya teyeng nulungi. Sewijining dina mbok Narilem merdhayoh, sing tujuane dheweke arep nyilih dhuwit nggo modhal dodol rames detum (ndeane cara jaman sikine ya sega kucing), deider-iderna neng pasar utawa nggon proyek bangunan. Kanti usaha kaya kuwe paling ora dheweke teyeng nunut sarapan utawa madhang.

Mung emane, wektu semena rama inyong lagi ora duwe dhuwit merga dhuwite bar nggo tuku pring arep nggo ngganti pager pedangan sing wis padha tepoh kenang udan panas utawane depangan rayap. Gandheng kaya kuwe, rama inyong aweh saran mbok Narilem kon nembung utang maring pak Kyai Jarkoni.

Ora nganggo mikir dawa mbok Narilem semaur lamona wis njajal nembung meng nganah. “Lha terus jawabane kepriwe?” pitakonane rama inyong, Kanti rai keton madan sedhih mbok Narilem ngomong: “Mboten purun ngutangi kula .. tirose kula niki sanes mukrime pak kyai ….”

Lagu Ibu Kita Kartini Mungel Kados Niku

Kayane wong Indonesia mligine kaum perempuan wis ngerteni lamona tanggal 21 April kuwe desebut Hari Kartini, yakuwe dina mengeti lahire RA. Kartini, putrine Bupati Jepara RM. Adipati Ario Sosroningrat sing nomer 5 sekang 11 putrane. RA. Kartini kuwe putri sing paling tuwa lan nduwe adhi wadon loro yakuwe: R.A Roekmini karo R.A Kardinah.

Miturut ramalan Horoskop Java versi 2.0, RA. Kartini sing lahir neng dina Senen Paing tanggal 21 April 1879 utawa tanggal 28 Rabiulakhir 1296H nduweni sifat-sifat sing antarane: pinter, tabah, betah prihatin, dermawan, apikan ati, mulia lan jujur. Dhong egin bocah, RA. Kartini klebu bocah cukatan, trengginas, ora gelem meneng, Mulane rama ibune gemes nganti marabi Kartini kanti jeneng Trinil.

Merga bocahe pancen anak preyayi, pinter, cerdhas mulane RA. Kartini bisa sekolah bareng karo sinyo-sinyo anak Landa neng sekolahan anak Landa ya kuwe ELS utawa Europese Lagere School. Kanti sekolah neng kene RA. Kartini teyeng ginau basa Landa lan bebatiran karo wong Landa.

Sebenere RA. Kartini ora seneng deundang Raden Ayu, piyambake lewih seneng deundang “Kartini” thok, ora perlu nganggo embel-embel “Raden Ayu” paringane keng ramane. Kartini ngerti lamona Raden Ayu kuwe mung status sing ora ana manfangate kanggone wong wadon, lan ora patut denggo agul-agul. Kartini prihatin priksa kahanan sing kaya kuwe, lan kepengin ngentasna kahanan sing kaya kuwe,

Miturut adat Jawa bocah wadon sing ngancik diwasa kudu depingit, semana uga RA. Kartini. Untunge RA. Kartini ngerti basa Landa lan duwe kenalan wong Landa sing ora semendhing klebu Snouck Hurgronje, dadine ya egin teyeng hubungan liwat layang. Maring batir-batire kuwe RA. Kartini ngudarasa babagan apa bae sing depikirna mligine babagan nasibe kaum perempuan Jawa.

Kumpulan layang-layange RA. Kartini maring batir-batire taun 1911 neng Mr. JH. Abendanon deterbitna dadi buku sing kondhang ya kuwe buku Door Duisternis tot Lich. Taun 1922 penerbit Balai Pustaka nerbitna buju “Habis Gelap Terbitlah Terang”.terjemahan sekang Door Duisternis tot Lich.

Neng dina Kamis Pahing, 12 November 1903 utawa tanggal 21 Syaban 1321H RA Kartini denikahna karo Singgih Djojo Adiningrat, Bupati Rembang, kanti kudangan degawekna sekolahan mligi nggo bocah-bocah wadon. Dina Selasa Pon tanggal 13 September 1904 lair putrane sing dejenengi RM. Susalit Joyoadhiningrat.

Mung emane RA. Kartini ora deparingi yuswa panjang mung 25 taun. Pas neng dina Setu Pahing tanggal 17 September 1905 RA. Kartini seda, pas lagi sarean neng pangkone garwane. RA. Kartini desarekaken neng makam keluwarga neng desa Bulu, watara 20 km lor kota Rembang.

Kanti landhesan kahanan kaya neng dhuwur kuwe, liwat Keputusan Presiden Republik Indonesia No. 108 Tahun 1964 tanggal 2 Mei 1964 RA. Kartini detetepna dadi Pahlawan Kemerdekaan Nasional, lan netepna uga dina laire RA. Kartini tanggal 21 April dadi “Hari Kartini” lan depengeti saben taune.

Mula kuwe gutul siki, saben tanggal 21 April biasane neng kantor apa dene plataran sekolahan ya deanakna upacara pengetan Hari Kartini. Bocah-bocah mligine bocah wadon padha nganggo penganggo tradisional. Neng upacara uga denyanyekna lagu Ibu Kita Kartini anggitane WR. Soepratman sing monine: “Ibu kita Kartini, Putri sejati, Putri Indonesia, Harum namanya ….” lan seteruse.

Neng sewijing kelas bu guru takon maring murid-muride sapa sing teyeng crita babagan RA. Kartini, Langsung baen si Tono sing neng batir-batire deundang “Toni” merga seneng ngomong ngawur kaya waton moni, ngacung karo ngomong: “Kula bu guru”. “Ya, jajal critakna Tono” semaure bu guru.

Tono langsng molahi crita: “RA. Kartini niku asale saking dusun Sejati, nalika enem nate dados Miss Indonesia utawi Putri Indonesia. Nalika alit asmane Harum ..”. “Setop .. setop .. ko olih crita kaya kuwe anu sekang endi?” pitakone bu guru. Kaya ora krasa salah si Tono semaur: “Lha lagu Ibu Kita Kartini mungel kados niku bu guru”.

Keanehan Pendapa Si Panji

Neng sejarah Banyumas kecathet lamona R. Jaka Kahiman (putra R. Banyaksasro sekang Pajajaran karo ibu sekang Pasir Luhur), sing neng Sultan Pajang detetepna dadi adipati Wirasaba kanti sebutan Adipati Warga Utama II nggenteni rama mertuwane Adipati Warga Utama I.

Kanti lila lan legawaning manah, R. Jaka Kahiman mbagi tlatah Wirasaba dadi papat, sing telung perangan dedunung-dunungna maring sedulur-sedulure. Dene R. Jaka Kahiman dhewek milih kondur neng desa Kejawar lan mangun dalem kadipaten neng cedhek alas tembagan, cedhek iline kali Banyumas uga cedhek karo iline kali Serayu.

Sekang ancer-ancer lan petilasan-petilasan sing ana bisa dengerteni lamona papan dalem kadipaten sing sepisanan degawe neng R. Jaka Kahiman kuwe neng tlatah desa Kalisube, sekulon desa Pekunden lan sewetan desa Dawuhan. Sekidule kono ana wit tembagan kaya sing decritakna neng babad Banyumas.

Pas pemrentahan bupati sing ping 7 (pitu) yakuwe R. Tumenggung Yudanegara II utawa sing uga kesebut Adipati Seda Pendapa (taun 1707 -1743) piyambake ada-ada mbangun (ora mboyong) dalem kadipaten maring panggonan sing anyar. Mulane piyambake mbangun kota Banyumas klebu dalem kadipatene sing kumplit karo pendhapane, sing dejenengi pendhapa Si Panji.

“Panji” kuwe sebenere asma paringan sekang Raden Mas Sujana (asma asline Sultan Hamengku Buwana I) nggo putrane R. Tumenggung Yudanegara II, sing asmane Bagus Kunting. RM. Sujana tresna banget maring Bagus Kunting, merga banget bektine maring RM. Sujana. Mbareng RM. Sujana dadi sultan neng Kraton Kasultanan Yogyakarta, Panji detetepna dadi patih sepisanan neng Kasultanan Yogyakarta kanti asma Patih Danureja.

Kaya sing wis padha dengerteni, lamona neng akhir taun 1936 bupati Banyumas sing kaping 19 ya kuwe RAA. Sujiman Gandasubrata ngersakna boyong sekang Banyumas maring Purwokerto, ningen ora kersa ngenggoni pendhapa sing lawas, mulane banjur mboyong pendhapa Si Panji sekang kota Banyumas maring kota Purwokerto nganti seprene. Taun 1974 bupati Pudjadi Djaring Bandajuda mbangun pendhapa anyar neng Banyumas sing dejenengi Pendapa Duplikat Si Panji.

Adhedhasar kahanan kasunyatan lan cathetan sujarah Pendhapa Si Panji mligine saka guru lor kulon kuwe nduweni keanehan kayata:

1. R. Tumenggung Yudanegara II sedan neng pendhapa kuwe, mulane kasebut Adipati Seda Pendapa;

2. Umume pendhapa kuwe payone wangun tikelan utawa joglo, ningen Pendhapa Si Panji nduwe wangun tajug;

3. Nalika dina Kemis Wage gutul Setu Manis tanggal 21 gutul 23 Februari 1861 neng Banyumas ana musibah blabur kali Serayu nganti 3,5 meter dhuwure. Payon pendhapa denggo ngili nylametna awak. Mung anehe sebubare banjir wangunan pendhapa tetep wutuh jetuh, beda karo wangunan pomahan sekiwa tengene sing wis padha rubuh lan keli;

4. Nalika boyongan pendhapa sekang Banyumas maring Purwokerto, miturut crita saka gurune ora gelem degawa nyabrang kali Serayu, dadi muter liwat pesisir lor pulau Jawa.

Winginane dhong ana arak-arakan pengetan dina adege Kabupaten Banyumas, ana acara Boyongan Kabupaten sekang Banyumas maring Purwokerto sing detandhani nganggo mboyong saka guru. Mung anehe tiruan saka guru kuwe degawa nganggo mobil bak bukakan langsung liwat brug kali Serayu lor pasar Banyumas. Kiye pancen sujarahe wis deganti apa ana temuan sejarah anyar maning.

Nggih Demut Mawon ....

Kanggone masarakat Banyumas mligine masarakat Baturaden, wis ora gumun lan wis ngerti banget babagan apa lan neng endi sing jenenge Gang Sadar kuwe. Masarakat uga wis ngerti pisan, ala-becike akibat sing detimbulna sekang tindakan sing delakoni neng kono, yakuwe prostitusi (tlembuk). Mulane seperangan warga masarakat kepengin gang Sadar kuwe detutup, ora maksud ora ana wong sing olih liwat neng kono, ningen ngendhegna prostitusi sing neng kono.

Nutup gang Sadar (panggonan prostitusi) kuwe ibarate nutup TPA (Tempat Pembuangan Akhir) runtah utawane padha karo nutup got buangan kotoran (Riool Kota). sing akibate runtah karo ambu kotoran dadi mambrah-mambrah maring endi ora. Apa awake dhewek kiye wis siap nampa lan nyegah anane ambu sing ora enak kuwe? Kabeh mau cetha ora mung dadi tanggung jawab pemerintah, ningen uga tanggung jawab kita kabeh.

Sejatine kawit taun 1989 pas ngrembug Raperda Rencana Umum Tata Ruang Kawasan Wisata Baturaden ya kuwe Perda No. 9 tahun 1989, babagan Gang Sadar nggo panggonan (lokalisasi) prostitusi wis derembug uga.

Seumpamane neng Baturaden arep desedhiani panggonan prostitusi, becike neng daerah sing madan angel deambah kayata neng Monggangsari. Wosing rembug, neng perda ora desebutna anane panggonan prostitusi, anane mung pembinaan maring para tlembuk sing manggon neng kana.

Wondene kegiatan pembinaan sing detindakna neng panggonan prostitusi kuwe mau kayata:

1.  Pendidikan budi pekerti/moral lan agama, kanti pangarep-arep moga-moga para tlembuk kuwe teyeng mengerteni lan nyadhari babagan sopan-santun lan aturan-aturan sing lemaku neng masarakat;

2. Kawruh babagan kesehatan, kanti ancas ben para tlembuk ngerteni lan njaga awake dhewek ben ora ketularan penyakit merga hubungan lanang wadon kuwe mau;

3.  Kumpulan PKK sing ajek para tlembuk karo mucikarine kumpulan, amrih gelem srawung, karo deajari ketrampilan sing ana manfangate kanggone para tlembuk.

Kahanan kaya kuwe lemaku wis suwe kanti becik, paling ora sewulan sepisan ana kumpulan nglaksanakna program kuwe.

Sewijining dina pas dina kumpulan para tlembuk kuwe mau, ana ibu-ibu wis setengah umur weruh akeh wong wadon padha kumpul ningen ora ngerti sapa sing kumpul lan apa tujuane kumpul kuwe mau. Deweke banjuran takon maring nom-noman sing ana neng kono. Ndilalah sing detakoni kuwe anu bocah sing seneng penjorangan.

Neng bocah enom sing seneng penjorangan kuwe mau pitakonan ibu-ibu dewangsuli lamona lagi ana kumpulan ibu-ibu anu mbagi coklat, lan sapa bae ya olih melu ngumpul lan olih bagian coklat kuwe mau. Olih wangsulan kaya kuwe mau si ibu-ibu gipyak maring nggon kumpulan ibu-ibu kuwe.

Mbareng pas gilirane depriksa, dokter sing mriksa madan kaget semu gumun, ana tlembuk koh wis setengah umur. Karo ngudhari blebed alat tensi, doktere takon: “Apa ibune egin kuwat si bu?” Maksude doktere egin kuwat nglayani wong lanang. Kanti anteng kayong ora ana beban, ibu-ibu kuwe mau semaur: “Angger mboten kiyat .. nggih demut mawon .. dangu-dangu kan saged lumer niku coklate, tirose kan badhe debageni coklat ”.

Kumpulan para tlembuk