Irunge Badrun Kelebon Klentheng

Jane inyong ya prihatin weruh kahanan jaman sekiye. Boro-boro bocah padha basa, padha ngajeni maring wong sing lewih tuwa, wong maring rama biyung utawa maring bapak ibu gurune be wis kaya ora ngajeni babar blas. Senenge padha ngumpul neng gili, udud-ududan malah cokan karo inum-inuman, ngomong genthoakan ora nggenah, dearuh-aruhi malah padha jengkel.

Neng ngumah ya padha baen. Boro-boro maring kakang mbekayune padha gelem salaman, wong maring rama biyunge be angger ketemu mlengos.. Senenge neng senthong kit esuk gutul sore dolanan hape. Angger deundang arep deprentah wangsulane jere “ya ngko”. Jar inyong yangko kuwe kan panganan asli Jogja, mulane banjur tek semauri “geplak kiye” (geplak uga panganan asli Jogja).

Babagan nyumedi lampu, jaman inyong bujang, urung ana listrik. Saben sore inyong kudu nyiapna petromak, lampu, senthir utawa ting, sing kudu diseni latung, delapi kaca utawa sempronge. Sendhekala kabeh kudu wis murub. Lha bocah jaman siki, kadar mung kari nyeklekna saklar be angele ora karuwan, Mulane inyong cokan ngarani bocah siki kuwe “seneng metengi tapi emoh kon madhangi”.

Babagan panganan bocah siki ya sering njengkelna biyunge. Biyunge repot-repot wis mantes, bali sekolah, panas-panas, kesel-kesel, kencot mantesen madhang lawuh tegehan kuwe seger pisan. E, jerene wis mampir jajan bakso apa tuku roti. Mubah olah-olahane.

Babagan basa pedinan ya repot maning. Neng sekolahan basa pengantare nganggo bahasa Indonesia. Lha angger inyong ngajari anak inyong basa pedinan neng umah nganggo basa Jawa, bocahe neng sekolahan ya kudu mikir ping pindho. Sepisan nerjemahna soal wulangan, angger wis mudheng tembe mikir kepriwe carane nggarap soal wulangan kuwe mau. Gegandhengan karo kuwe mau, mulane anak inyong neng ngumah ya deajari basa Indonesia ben ora kangelan neng sekolahan.

Babagan anggah-ungguh karo wulangan basa Jawa ya kepaksane desinaoni neng dhewek. Inyong ya pancen madan kewalahan ngajari anak inyong dhewek. Apa maning sekolah neng kota, sing batir srawungane utawa batir dolanane kuwe ya werna-werna, ana Jawa, lan akeh uga Cinane, dadine ya budhayane campuran.

Sewijining dina inyong lagi nyinaoni wulangan basa Jawa, sing tek wiwiti sekang kon maca ukara-ukara basa Jawa. Sewise anak inyong kon mbukak buku piwulang basa Jawa, sing neng kono ana sewijining ukara sing tulisane “Irunge Badrun kelebon klenteng”.Neng batin inyong wis mbedhek lamona anak inyong pas maca ukara kuwe mesthi salah.

Temenan. Mbareng anak inyong maca ukara kuwe monine koh: “Irunge Badrun kelebon klentheng” (nganggo e taling) sing artine umah panggonan ibadah Cina. Inyong ora teyeng mbayangna sepira ambane bolongan irunge Badrun. Mbangkane janen sing demaksud kuwe ya irunge Badrun kelebon klentheng (nganggo e pepet) sing maksude wiji kapuk randhu.