JAMANE WIS OWAH

Jaman gemiyen ……………..

Mangsa karo, terang sore bubar asar

neng lapang bujang pirang-pirang ngunda layangan

adine tembangan .... “cempe, cempe undangena barat gedhe tek upahi banyu tape, selodhong sepane ora entong nggo bapane” …… srubud srubud ……

Bolah gelasan … deulur .... dhuwur ………. nggo sangkutan.

Pedhot siji nggo rebutan, kleyang …. kleyang …. temangsang pucuk pucang. Penjorangan.

Padang wulan, bocah dolanan rame pisan

sing cilik jamuran, sing gede gobag sodor, cowongan utawa jonjang umpetan

lanang wadon, usrek umpetan neng dapuran gedang mburi pedangan… Aman.

Bubar gobag, njlog-njlogan, neng tanjlig kali kidul desa

baline, mburak batire …. sing dhisit dadi lebe, sing keri kethok gulune ….

Bocah wadon padha keweden.

Nganti sekiye inyong urung kelalen alias esih kelingan,

saben bengi ramane rengeng-rengeng karo kedhengan neng risban,

biyunge neng senthong ndongeng.

Ana …… ana baen sing dedongengena.

Wingi ndongeng kancil nyolong timun, siki timun emas utawane keong emas

ngesuke maning lutung kesarung, ngembene ndongeng ragil kuning,

ana …… ana baen, ora bakal kentongan dongengan.

Embuh rampung embuh urung dongenge si biyung

esuk umun-umun awak atis, kathok ngecepoh ....... ngompol.

Sekiye jamane wis owah, papah mamah arang neng umah

bujang tanggung tengah wengi nyetel tivi

remot detenet-tenet, “lah ini diye” acarane

mripat merem melik, lambe mesam-mesem .... ler angler terus keturon

jam papat gagat esuk, kaget, ….. aduh ...... kudu wuwung kiye. Mbengi ngimpi.

Jaman gemiyen …… belik bening, kali mili, song bolong, blumbang pirang-pirang

pinggiran irigasi, gili cilik kena nggo playon utawa pit-pitan

neng kali lele, lenthis, benter apa dene iwak wader pating sliwer

regem olih melem, mancing olih uceng, nyeser olihe mujaer

nyirib kena nggo urip, sarap madhang nyore ora kurang gorengan

Jamane siki wis owah, alame ya melu baen

udan salah mangsa, ora beda terang apa rendhengan, mangsa telu apa wolu

banyu kali ora mili, banjir bandang ora nyawang, teka sekayang-kayang, 

uceng, urang watang utawa kunang, manuk pudhang padha ngilang,

dok, blekok karo gaok mogok ora ngendog ….. wedi mbok degodog

Runtah mambrah-mambrah neng dalan ngarep umah malah terus tambah

Jamane wis owah …..

Anak polah bapa kepradhah,

bapa polah malah anak demamah …… ora nggenah

Duh Gusti Allah …

Jamane mpun ewah ….. napa kula sing salah,

kula sagede mung pasrah.

Purwokerto, 18 Juli 2006