TANCEP KAYON

Ujaring kandha para pujangga winaskita,

pakeliran wayang pralambang tiyang ngagesang

kapurwanan mbabaring si jabang bayi

tumekeng pati kangge mungkasi.

Blencong gumantung minangka surya sumbering ngaurip

kelir mori putih gumelar kadya jembaring angkasa

gong bonang gambang kendhang kumandhang binarung tembang

lambang paugeran gesang ing alam padhang

nata titah Gusti pamrih laku lugu saeka karsa.

Dhog ..... dhog-dhog-dhog ..... drodhog ..... dhog

sak ngandhaping blencong padhang pindha sunaring baskara

ki dhalang kondhang lenggah gagah angedhangkrang

cempala kajepit jempol suku kanan,

asta kiwa nothok kothak paring sasmita mring pra niyaga

pratandha sampun kawiwitan pakeliran ringgit purwa.

Gancaring cinarita

Rahwana raja Ngalengka, kang suka nata, wanita, lan arta

anyulik Shinta kang melik kidang lan kencana,

agawe sengsara para kadang lan kawula sak nagara

nom-noman nama Anoman ngobong Ngalengka sanalika.

Ganti kang cinarita, tunggal panggung beda kang cinarita

Ngasitnapura, pinarintah nata kang adigang adigung adiguna

Sengkuni patih sugih amargi komisi lan kerep korupsi

Kurawa ...... kaluwarga raja kang minangka pamonging negari

datan kena lena “ma lima” kelangenannya

Reformasi ..... sesanti putra putri negari

sang nata lengser lan pinidana saknalika.

Sarining pakem pakeliran ringgit sadalu muput

titah lumampah ing alam dunya ..... becik katitik ala ketara

kalimat, tabiat, shalat, lan taubat umat

datan keliwat sinurat malaikat, kangge sangu gesang ing akhirat.

Pathet sanga ginanti pathet manyura

pratandha wus meh gagat raina

ujaring kandha

pindha cakra manggilingan gesang ing bebrayan

lahir, rabi, rizki, lan pati lir gumanti wus pinasti kersaning Gusti.

Tancep kayon.

 

Purwokerto, 5 Juni 1999